Kaise vyakt karen hey Maa! Tera yeh Nirmal Prem.
Bhool gaya mai yeh jag sara, hua pulkit rom-rom.
Bhatak gaya tha panth, mai balak nadan.
Kho gaya tha bhool bhulaiya me, par tune liya pahchan.
Ulajh gaya tha beech bhanwar me, asahay ho kar tujhe pukara.
Har baar aaarat ko diya tune sahara.
Hey karunamayi Maa! Tune ubara, divya-prem me nahalaya.
Sinch kar premamrit, puchakara aur sahalaya.
Pran saman apane tune, mujhko rakha sambhal.
Phir ab bhay kaisa, kare jo tu mera dekh-bhal.
Band hui sisakiyan meri, ab tera Nirmal Prem paya.
Isiliye hriday mera, tere prem ka geet gaya.
